كيف اختصر فوضى الأنوثة فيك؟!
كيف أعبرك وشلون أعديك؟!
ياهيه يا مدلل
تمهل..
حس بي وشفيك؟
ما تشوفني حولك أطير وأشتعل..
من غيرتي وأطفيك؟
ما تشوف كيف أتفجرّك وأتصبرّك
وأتصوّرك وألغيك؟
ياهيه.. كيف أرضيك؟
وأنت إن زعلت أشقيتني..
بالظن والتشكيك؟!
وإن طاب خاطر حضرتك..
ذليتني..
في كثرة تْغليك؟!
ياهيه ربي يحفظك ويصونك ويهديك!.
والله يعين اللي يبيك.
خلك من التطنيش
عيش بصحبتي أو لا تعيش!
وأتصور إني ألمحك وأساهرك وأصبحك
وأطير لك في كل يوم بلا رياح وريش!
وأتخيل إني أسمعك واستمتعك وأمشي معك..
وأتابعك وقت الدلع وأطيش!
يا خانق عروقي بكف العشق
يا ليت يبحر بك شراع العشق
وتخفض جناح الطيش.!!
أنت اللي تحسه مو هوى..
وين الهوى عنّك كأنك ما هويت..
أو ما شكيت من الجفا والعذل والتشويش؟!
وين الهوى عنك كأنك مو كأنك!!..
ما كأن اللي جمعنا ملح ولاّ عيش؟!
الحب أنا وحدي.. وغيري
حقه التهميش؟
ومادمت لي كلك..
وكلي لك..
أبحكي لك:
أنا أناني بورد بستاني
ولا ودي ف بستاني شريك.
ومحتار كيف أرويك
وكيف أقضي على ماضيك؟
وكيف أختصر فوضى الأنوثة فيك
وكيف أعبرك وشلون أعديك
ياهيه.. يا مدلل
تمهّل..
حس بي.. وشفيك؟.
ياهيه ربي يحفظك ويصونك ويهديك..
والله يعين إللي يبيك.
قبلي تراك أتعبت خلق الله..!
واليوم متعبني معاك.. ولاهي بخلق الله؟!
يا هَم خلق الله..
ويا شغل خلق الله..
ويا أعذب إحساس تورّد بين خلق الله..
أموت بك والله..
والله عليك الله..
يا الفاتن المجدول
ما بين صمت وقول
ويا أحب خلق الله.
الناس من طين، وعجينك من ذهب والله!؟
وأنفاسك من الياسمين..
وبحر عينك من ظما
والزول (باسم الله)
ارفق بعبد الله..
ارفق تراي أضعف بشر
لا شفت صنع الله.!!
وارفق ترى مالي طبيب.. إلا أنت بعد الله.
ياللي من سهومك أوّن..
ومن صخب يومك أجن..
وشكوتي لله.
شاريك وملهوف عليك..
وليت بيدي..
لو أسجنك
ثم أقتلك
وأحييك!
وأتعلم شلون أشربك
وأغيّبك
وأخفيك!
وكيف أختصر فوضى الأنوثة فيك
وكيف أعبرك وشلون أعدّيك..
ياهيه.. يا مدلل..
تمهّل..
حس بي وش فيك؟؟
ياهيه ربي يحفظك ويصونك ويهديك..
والله يعين إللي يبيك.!!