ادخل ياطيب وشوف الطيب

أنا ربتني الدنيا على جـزل العطـا والجـود

ونفسي للوفا والطيب وفعـل الخيـر جزامـه
.

وأعارض منهج الهابط وأوافق للصعود صعود
وأسيّر نفسـي بعقلـي مـدام النفـس هدامـه
.

ولا تثّر بي البسمة ولا كحـل العيـون السـود
ولا يقوى على قلبي صغير الحسـد وأجسامـه
.

أردّ الجود بأمثالـه وأقابـل بالجحـود جحـود
وترى لا خير في رجلٍ يوطّـي للـردى هامـه
.

وعندي مع أهل العِليا مواثيق وثـلاث عهـود
أوفـي لـه مطاليبـه وأودّه وأرفـع أعلامـه
.

أعايش مركب الدنيا على متن القـدر مولـود
أبعرف هو صحيح إنّ القدر بالنـاس دوّامـه ؟
.

ومن وين الزمن مقبل وإلى وين الليـال تقـود
ومن في هالزمن يقدر يوجّـه خطـوة أقدامـه
.

ومن له بالزمن غاية ومن عنده هدف منشود
ومن منّا قدر يعـرف خفايـا مقبـل أيامـه ؟
.

عرفت إنّ الشقا باقي ، عرفت إنّ الحسد موجود
عرفت إنّ القدر يفرض علينا بأسـوأ أحكامـه
.

لقينا العرب حاسد وشفنـا بالعـرب محسـود
وبه ناسٍ لنا ضامت ، وبـه بالنـاس منظامـه
.

وينقص بعضنا خوّه وينقصنـا وفـاء وعـود
مدام الحسـد باقـي وبعـض النـاس نمامـه
.

ولا ترجى بها الدنيا من ربوعك يجيك اسنـود
ولا تشره على رجلٍ عيونـه خانـت أقدامـه
.

وقابل خطوة بخطوة وجازي بالصدود صـدود
تناسى غلطة الصاحب عليك بلحظة اخصامـه
.

ولا تخطي ترى لصبر الحليم اليا سلاك حـدود
تروّى واعرف بضرب الحديـد تفكـك لحامـه
.

تجنب كسرة الخاطر ولو حبل الزعل مشـدود
تراك بكسرة الخاطر حكمـت القلـب بعدامـه
.

ولا تزعل على رجلٍ بذل لك ولرضـاك جهـود
ولا تامن من الحاسد رضـاه ورفعـة ابهامـه
.

نبي نصبر على الدنيا قلـوبٍ بالحيـاة زهـود
مدام إنّ البخت عيّـت توّفـق رمعـة سهامـه
.

وأنا ما قلتها راجي ولا أطلب بعدهـا مـردود
ولكـن الفتـى ودّه يحقـق جملـة أحـلامـه
.

وبمشي لآخر الدنيا ولـو كـلّ الأنـام اقعـود
وعن وجه الزمن بكشف حقيقه وأرفـع الثامـه
.

صحيح إني صغير السن ولكن قدهـا وقـدود
وأنا عندي مع الدنيـا مواقـف ترفـع الهامـه
.

طموحي يملـي العالـم ولابـه للطمـوح قيـود
مدام إن الأمل طبعي عرين وصرت ضرغامـه
.

خلقنا الله من ترابه ولأحضان التـراب نعـود
تحت رمل الثرى نبقى تغطـي جسمنـا خامـه
.

سلفنا ما لحقناهم تحـت قـاع التـراب رقـود
ولا يبقي من الميت سـوى ذكـراه وعظامـه
.

ولو طال العمر فاني وترى عمر الفتى محـدود
وكلٍ يطلب المولـى يبيحـه يحسـن ختامـه
.

وأنا بلّغـت بلسانـي وربـي والأنـام شهـود
وصحف البيّنة جفّت وعنهـا رفعـت أقلامـه


من كلمات الشاعر حامد زيد